Reklam
45 il bundan öncə kosmosdan gəlmiş sirli radiosiqnalın mümkün mənbəyi təyin edilib

45 il bundan öncə kosmosdan gəlmiş sirli radiosiqnalın mümkün mənbəyi təyin edilib

Süni zəka və Elm
19.05.2022 PAYLAŞIM

    1960-cı ildən astronomlar potensial yadplanetli sivilizasiyalardan siqnal qəbul etməyə çalışırlar. Lakin hələ də bu cür sivilizasiyaların mövcud olduqları üzrə tutarlı bir sübut yoxdur. Bu mövzu ətrafında qəbul edilmiş ən məşhur siqnal 1977-ci ildə kosmosdan gəlmiş və yerüstü radioteleskop vasitəsilə qəbul edilmiş 72 saniyəlik radiosiqnal hesab edilir. “Wow” adını əldə etmiş həmin siqnal nəticədə astronomları məyus etmişdi. Belə ki, həmin siqnal bir də təkrarlanmadı. Lakin The Habitable Exoplanet Hunting Project layihəsinin (həyatın mümkün olacağı ekzoplanetlərin axtarışı ilə məşğul olur) alimi Alberto Caballero-nun təqdim etmiş olduğu tədqiqatda o, həmin məşhur və eyni zamanda gizli siqnalın mümkün mənbəyini qeyd edib. Söhbət, bizim Günəşə bənzəyən ulduzdan gedir. Jerry Ehman adlı astronom kosmosdan gəlmiş bu məşhur radiosiqnalı 15 avqust 1977-c il tarixində aşkar etmişdi. Bu, Ohayo ştatındakı Ohayo Dövlət Universitetinin Big Ear” adlı radioteleskopunun, kosmosun Oxatan bürcündə yerləşən hissəsini skan edən zaman baş vermişdi. Bu siqnal kosmik mikrodalğa arxa fon şüalanmasından 20 dəfə güclü idi. Siqnalın bütün özəllikləri potensial yadplanetli sivilizasiyadan gələ biləcək siqnala işarə edirdilər.

Növbəti gün isə Ehman sözügedən siqnalın simvollardan ibarət yazısını çap etmiş və onların yadplanetli sivilizasiya tərəfindən göndərilə biləcək siqnalın nəzəri özəllikləri ilə necə üst-üstə düşdüklərindən heyrətə gəlmişdi.


    Buna görə də astronom çap edilmiş kağızın üzərinə “Wow” sözünü yazmışdı və həmin vaxtdan bu məşhur radiosiqnal məhz bu cür adlanır. “Əgər söhbət, yadplanetli həyat növündən gedirsə, “Wow” siqnalı indiyənə kimi yadplanetli sivilizasiya tərəfindən göndərilə biləcək siqnallar arasındakı ən yaxşı namizəddir. Lakin 45 il ərzində astronomlar təkrar olaraq bu cür siqnalları aşkar edə bilməyiblər” - deyə Alberto Caballero qeyd edib. İndiyənə kimi alimlər sadəcə olaraq buna bənzər siqnalları kosmosun eyni hissəsində axtarıblar. Lakin Caballero öz axtarışlarını, ətraflarında münbit həyat şəraitinə sahib ola biləcək planetlərin dövr etdikləri ulduzlara yönəldib. Söhbət, Yer kürəsinə bənzər planetlərdən gedir. Minlərlə ulduz arasında astronom öz diqqətini GK sinifinə daxil olan ulduzlara ayırıb. G sinifinə daxil olan ulduzlar bizim Günəş kimi sarı cırtdan ulduzlardır. K sinifinə daxil olan ulduzlar isə Günəşə bənzəyən narıncı cırtdan ulduzlardır. K sinifinə daxil olan ulduzların ətraflarında elə planetlər ola bilər ki, onlarda həyat Yer kürəsindən daha yaxşı şərtlər çərçivəsində inkişaf etmiş olsun.

Tədqiqat çərçivəsində Caballero minlərlə ulduz arasında G və K siniflərinə daxil olan ümumi 66 ədəd ulduz aşkar edib. Lakin onların arasında onun əsas diqqətini 2MASS 19281982-2640123 adlı ulduz cəlb edib.

    Həmin ulduz ölçü, temperatur və parlaqlıq göstəriciləri baxımından maksimal dərəcədə Günəşə bənzəyir. Bu ulduz Yer kürəsindən təqribi olaraq 1800 işıq ili uzaqlığında yerləşir. Bundan əlavə olaraq astronom bizim Günəş kimi parlaqlığa və temperatura sahib ola biləcək daha iki ulduzu qeyd edib. Caballero-nun sözlərinə əsasən daha 14 dəd ulduz bizim Günəşin sahib olduğu temperatur göstəricilərinə sahib ola bilər. Lakin onların parlaqlıqları barəsində hələ məlumat yoxdur. “Mən düşünürəm ki, bu 66 ədəd ulduzdan istənilən biri detallı araşdırma obyektinə çevrilə bilər. Lakin 2MASS 19281982-2640123 və bir neçə ulduz potensial həyat növünə sahib planetlərin öz ətraflarında dövr etmələri baxımından bütün şanslara sahibdirlər. “Wow” siqnalı kosmosun məhz bu hissəsindən gəlmiş ola bilər” - deyə Caballero qeyd edib. Astronomun sözlərinə əsasən əgər sözügedən siqnal 2MASS 19281982-2640123 adlı ulduzun yaxınlığında yerləşən planetdən gəlibsə, Yer kürəsindən cavab siqnalın ora gedib çatması üçün yüzlərlə il vaxt lazım olacaq. “Mən, bu ulduz sistemində ekzoplanetlərin və həmin ekzoplanetlərdə ola biləcək potensial yadplanetli sivilizasiyaların mövcudluqlarına işarə edəcək texnoloji izlərin axtarılmasını təklif edirəm. Bununla belə mənim təklif etdiyim digər ulduz sistemlərində də axtarışlar aparmaq olar” - deyə Caballero qeyd edib.

Qeyd: Şərhlərdə nalayiq ifadələr işlətmək, reklam xarakterli mətn paylaşmaq qadağandır.

Şərh yoxdur

Şərh yazmaq üçün daxil olun


DAHA ÇOX


Çinli alimlər qan damarları vasitəsilə beyin implantını keçi beyninə yerləşdiri..

Beyin implantının beyinə yerləşdirilməsi cərrahiyyə əməliyyatının keçirilməsini tələb edir və bu cür..


Kosmosun ən uzaq məsafəsinə nəzər yetirmək: James Webb teleskopu yeni rekorda ha..

12 iyul tarixində astronomiya sahəsində növbəti vacib hadisə baş verəcək.


Günəş sistemindən kənarda yerləşən planetlərdə çətin şərtlərə adaptasiya olmuş h..

İsveçrəli alimlərin fikirlərinə əsasən “həyat üçün potensial münbit şəraitə sahib ekzoplanet” anlayı..


Süd Yolu qalaktikasının ən böyük ulduzu öz həyat dövrünün sonuna yaxınlaşır..

VY Canis Majoris adlı qırmızı hipernəhəng ulduz Yer kürəsindən 3900 işıq ili uzaqlığında Böyük Köpək..


Təbii fotosintez lazım deyil: Alimlər bitkilərin tam qaranlıq mühitdə becərilməs..

ABŞ-ın Riversayd şəhərində yerləşən Kaliforniya Universitetinin alimləri bitkilərin tam qaranlıq müh..


Ayda nüvə energetikası: NASA Yer kürəsinin peykində nüvə enerqosistemini yaratma..

NASA ABŞ Energetika Nazirliyi ilə birlikdə Ayda yerüstü nüvə enerqosisteminin yaradılması layihəsi ü..

×