Reuters saytının verdiyi məlumata əsasən bu il ABŞ-ın elektromobil istehsalı ilə məşğul olan startapları öz məhsullarına tələbatın aşağı düşməsi halı ilə qarşılaşıblar. Belə ki, potensial alıcılar ya başqa maraqlı variantların axtarışında olurlar, ya da elektromobil alışını gələcəyə saxlayırlar. Mütəxəssislərin fikirlərinə əsasən bu, Tesla şirkətinin öz elektromobillərinin qiymətlərini aşağı salması və ənənəvi avtomobil istehsalçılarının daha ucuz model avtomobillər təklif etmələri ilə bağlıdır. Öz məhsullarına tələbatın aşağı düşməsindən gileylənən startaplar arasında Lucid, Rivian və Nikola kimi şirkətlər var. Məsələn, Tesla Model Y elektromobilinin qiyməti 54 900$-a düşüb. Müqayisə üçün qeyd etmək lazımdır ki, Rivian-ın R1S adlı krossoveri 78 000$-a, Lucid-in isə Air Pure adlı sedanı 87 400$-a satılır. ABŞ-da istehsal edilmiş elektromobillərin alışı zamanı 7500$-a kimi federal subsidiyaların işə salınması öz növbəsində elektromobillərə daha çox tələbatın olacağına ümid yeri verir.