ABŞ hökuməti 2019-cu ildə Huawei şirkətinə qarşı sanksiyalar tətbiq edən zaman onunla əməkdaşlıq etmiş yerli şirkətlər üçün əməkdaşlığın davam etdirilməsi imkanını qoruyub saxlamışdı. Lakin bu halda yerli şirkətlər müvafiq orqanlardan eksport lisenziyalarını əldə etməli idilər. Verilmiş yeni məlumata əsasən ABŞ hökuməti yerli şirkətlər üçün nəzərdə tutulmuş eksport lisenziyalarının müddətlərini uzatmayacaq və üstəlik yeni lisenziyaların verilməsini dayandıracaq. Beləliklə Huawei şirkəti ABŞ texnologiyalarından tamamilə məhrum ola bilər. Bu barədə məlumatı Financial Times saytı öz mənbələrinə istinadən təqdim edib. Məlumata əsasən Huawei ilə əməkdaşlığı davam etdirən və eksport lisenziyalarına sahib olan bəzi ABŞ şirkətlərinin dövlət tərəfindən əldə etdikləri bildirişlərdə qeyd edilib ki, yeni lisenziyaların verilməsi ümumiyyətlə dayandırılacaq.

    İndiyənə kimi Intel və Qualcomm kimi şirkətlər Huawei ilə əməkdaşlıqlarını davam etdirə bilirdilər. Lakin bunun əsas şərtlərindən biri o idi ki, bu şirkətlər Huawei-yə 5G şəbəkəsi ilə bağlı texnologiyaları təqdim etməməlidirlər. Bəzi amerikalı məmurların fikirlərinə əsasən ABŞ hökuməti tərəfindən bu cür sanksiyaların təyin edilməsindən sonra Huawei sualtı naqillər vasitəsilə məlumatların ötürülməsi üsullarının hazırlanmasına və bulud hesablama sistemlərinin inkişaf etdirilməsinə yönəlib. Bu isə öz növbəsində ABŞ-ın milli təhlükəsizliyinə müəyyən təhlükələr yarada bilər. Bu səbəbdən də Huawei-yə qarşı sanksiyalar genişləndirilməsə də, onun partnyorlarına eksport lisenziyalarının təqdim edilməsinin dayandırılması qərarı qəbul edilib. ABŞ Ticarət Nazirliyi və Huawei şirkəti ortaya çıxmış bu xəbərə rəsmi bir fikir bildirməyiblər.

Bənzər xəbər

Facebook, Amazon kimi şirkətlərə azərbaycanlılar necə qəbul olur? (VEBİNAR)