Whatsapp tərtibatçıları messencerə yeni faydalı funksiyanı əlavə etməyə başlayıblar. Söhbət, fotoların HD keyfiyyətində göndərilməsi funksiyasından gedir. Sözügedən funksiya hal hazırda messencerin Android üçün olan 2.23.12.13 nömrəli beta versiyasında və iOS üçün olan 23.11.0.76 nömrəli beta versiyasında aktivdir. Bununla belə bu yeni funksiya heç də bütün beta test istifadəçiləri üçün aktiv deyil.

    Lakin yaxın zamanda o, daha çox istifadəçi üçün təqdim ediləcək. İndiyənə kimi Whatsapp göndərilən fotoları avtomatik sıxaraq onları SD keyfiyyətə salırdı. Nəticədə göndərilən fotoların keyfiyyətləri daha aşağı səviyyədə olurdu. Bu funksiyanın istifadəyə verilməsi ilə isə vəziyyət yaxşıya doğru dəyişəcək. Belə ki, bu funksiya fotoları ilkin yüksək keyfiyyətdə göndərməyə imkan verir. Bunun üçün istifadəçi göndərilən fotonun keyfiyyətini HD olaraq seçməli olacaq.