Xiaomi şirkəti özünün avtomobillər üçün nəzərdə tutulmuş avtopilot sistemi barəsində ilk məlumatları təqdim edib. Qeyd etmək lazımdır ki, şirkət bu istiqamətdə işlərə 2021-ci ilin mart ayında start vermişdi. Həmin vaxtdan Xiaomi bu sahədə ciddi nailiyyətlər əldə edib və öz avtopilot sisteminin avtomobil yollarında testlərinə start verib. Məlumata əsasən hal hazırda Xiaomi-nin avtopilot texnologiyasını əhatə edən şöbəsinə 500 nəfər işçi daxildir. İlkin mərhələdə şirkət bu texnologiyanın hazırlanmasına 490 milyon dollar investisiya yatırıb. “Xiaomi-nin avtopilot texnologiyası bizim bütün gözləntilərimizi geridə qoyub” - deyə Xiaomi şirkətinin CEO-su Lei Jun qeyd edib.

    Şirkət tərəfindən təqdim edilmiş videoda Xiaomi-nin avtopilot sistemi müxtəlif ssenarilər çərçivəsində dəqiq, təhlükəsiz və intellektual sürücülük qabiliyyətini sərgiləyir. Uğurlu avtopilot sisteminin yaradılmasında həmçinin Xiaomi-nin Shendong Technology adlı startapı alması da kömək edib. Bu startapın hesabına Xiaomi texnoloji təcrübəsini və kadr potensialını genişləndirib. Şirkətin əsas məqsədlərindən biri 2024-cü ilə kimi avtonom sürücülük sahəsində olan liderlər siyahısına daxil olmaqdır. Bu məqsədə çatmaq üçün şirkət avtopilot sisteminə sahib 140 avtomobil yaratmağı planlaşdırır. Həmin avtomobillər isə bütün Çin üzrə test ediləcəklər.