Tesla AI Day Part 2 tədbirinin keçirilməsinə az müddət qalmış şirkət insana bənzər Tesla Optimus adlı robotun prototipinin əllərinin əks olunduğu tizer fotosunu təqdim edib. Daha öncəki plana əsasən robotun təqdimatı 19 avqust tarixində baş tutmalı idi. Lakin bir müddət bundan öncə Elon Musk bu təqdimatın sentyabr sonuna təxirə salındığını elan etmişdi. Keçən ilki Tesla AI Day tədbiri əsasən Tesla elektromobillərindəki pilotsuz idarəetmə sisteminə həsr edilmişdi. Lakin bununla belə şirkət Dojo adlı superkompüterini təqdim etmiş və insana bənzər Tesla Optimus adlı robotu anons etmişdi.

    İkinci Tesla AI Day-in birinci tədbirdən düz il sonra baş tutacağı gözlənilirdi. Lakin şirkət tədbiri sentyabr ayının sonuna təxirə salmalı oldu. Musk bildirmişdi ki, tədbirin təxirə salınması nəticəsində əldə edilmiş əlavə zaman qeyd edilmiş tarixə kimi Tesla Optimus-un işlək prototipini hazırlamağa imkan verəcək. Tesla şirkətinin səhmdarları ilə görüş zamanı Musk Tesla AI Day Part 2 tədbiri üçün nəzərdə tutulmuş tizer fotosunu təqdim edib. Təqdim edilmiş tizer fotoda real robotun güman olunan prototipinin əlləri əks olunub. Keçən ilki tədbir çərçivəsində Musk sözügedən robotu anons etməklə yetinməmişdi.

    Belə ki, bütün bu müddət ərzində o bu layihəni aktiv şəkildə inkişaf etdirib. O daha öncə də qeyd etmişdi ki, robotların hazırlanması 2022-ci ildə Tesla üçün prioritetli layihələrdən biri olacaq. İndi isə Musk yenidən robotların istehsal edilib satılması biznesini irimiqyaslı biznesə çevirmək qərarının olduğunu təsdiqləyib. Onun sözlərinə əsasən uzunmüddətli perspektivdə robotlar nəqliyyatdan daha vacib olacaqlar. Öz bəyanatlarından birində Musk bildirmişdi ki, insana bənzər robotlar iş qüvvəsi problemini həll edə və ümumilikdə istehsalat sahəsindəki xərcləri aşağı sala bilərlər.