Qualcomm şirkəti keçən həftə Snapdragon 8 Gen 3 flaqman prosessorunun təqdimat tədbirini anons etmişdi. Təqdimat 24 oktyabr tarixində baş tutacaq. İndi isə şirkət sözügedən prosessorun lazımi şəkildə optimizasiya edilməsi prosesindədir. Nəzərə almaq lazımdır ki, bu cür məhsulun test versiyasından fərqli olaraq istehlakçı versiyası dəqiq şəkildə optimizasiya edilməlidir. Əks halda prosessor tərəfindən smartfon resurslarının düzgün olmayan şəkildə istifadəsi və prosessorun sürətlə qızması problemləri yarana bilər. İnsayderlərin vermiş olduqları yeni məlumata əsasən şirkət ilk öncə Snapdragon 8 Gen 3-ün Cortex-X4 nüvəsinin çalışma tezliyini 3.4 GHz səviyyəsində təyin etmək istəyirdi.

    İndi isə bu göstərici 3.18 GHz tezlikdə təyin edilib. Bu isə Snapdragon 8 Gen 2-nin Cortex-X3 nüvəsinin çalışma tezliyi (3.2 GHz) ilə eyni səviyyədədir. Bu, ilk baxışdan Snapdragon 8 Gen 3-də hər hansısa bir irəliləyişin olmayacağı fikrini yaradır. Lakin prosessorun Geekbench 5 test nəticələri diqqəti cəlb edirlər. Belə ki, prosessor Geekbench 5-in bir nüvəli testi çərçivəsində 1700 xal, çox nüvəli testi çərçivəsində isə 6600 xal toplayır. Müqayisə üçün qeyd etmək lazımdır ki, Snapdragon 8 Gen 2 eyni bençmarkın bir nüvəli testi çərçivəsində 1480 xal, çox nüvəli testi çərçivəsində isə 4750 xal toplayır.