Keçən həftə Qualcomm şirkəti Snapdragon 8 Gen 1 adlı yeni flaqman prosessorunu təqdim etmişdi. Lakin bir çoxlarını maraqlandıran sual ondan ibarət oldu ki, nəyə görə şirkət yeni prosessorunu məhz bu cür adlandırıb. Bu məsələyə Qualcomm şirkətinin marketinq üzrə direktoru və baş vitse-prezidenti Don McGuire aydınlıq gətirib. Qeyd etmək lazımdır ki, keçən ilin sonunda şirkət Snapdragon 888 prosessorunu təqdim etmişdi. Bu il isə gözləntilərə əsasən şirkət yeni prosessorunu Snapdragon 898 adlandırmalı idi. Bununla yanaşı yeni prosessorun məhz Snapdragon 898 adını əldə edəcəyini bəzi nüfuzlu insayderlər də bildirmişdilər.

    Bu cür adlandırma ilə Snapdragon prosessorları arasında müqayisəni təyin etmək asandır. Aydın məsələdir ki, Snapdragon 8 Snapdragon 7-dən, Snapdragon 888 isə Snapdragon 870-dən daha yaxşıdır. Qualcomm təmsilçisinin verdiyi məlumata əsasən yeni prosessorun Snapdragon 8 Gen 1 adını əldə etməsinin səbəbi çox sadədir. Belə ki, şirkət növbəti prosessorlarının adlandırmalarında ədədlərin çatışmazlığı ilə qarşılaşa bilərdi. Təbii ki, bu məsələdə şirkətin nəyə görə 1000 ədədinə çatmaması və hətta ondan sonraya keçid etməməsinin səbəbi məlum deyil.

    Hər halda çox güman ki, bizi gələcəkdə Snapdragon 8 Gen 2, Snapdragon 8 Gen 3 və s. gözləyir. Heç istisna deyil ki, şirkət öz prosessorlarının adlandırılmasında tamamilə yeni üsula keçid etsin. Bundan əlavə olaraq Qualcomm gələcəkdə yalnız Snapdragon brendini irəli çəkməyi hədəfləyib. Məsələn Çin bazarında Qualcomm şirkət adını Snapdragon məhsullarının adlarının əvvəllərində qeyd etmir. Şirkət bu strategiyanı artıq qlobal bazarda da reallaşdıracaq. Şirkətin fikrinə əsasən Qualcomm + Snapdragon kombinasiyası ada və brendin inkişafına mənfi təsir göstərir.