SpaceX şirkətinin CEO-su Elon Musk planetlərarası Starship kosmik raketinin ilk orbital uçuşunu anons edib. Musk öz Twitter hesabında qeyd edib ki, Starship bir neçə həftədən sonra ilk orbital uçuşu üçün tam hazır olacaq. Beləliklə şirkət Starship-in ilk orbital uçuşunu gələn ay reallaşdırmağı planlaşdırır. Lakin bu məsələdə konkret bir tarix təyin edilməyib. Bunun əsas səbəbi isə şirkətin aviasiya üzrə müvafiq dövlət orqanından icazəni hələ almamasındadır.

    Güman olunur ki, Starship-in ilk orbital uçuşu aprel ayının üçüncü həftəsinin sonunda baş tuta bilər. Qeyd etmək lazımdır ki, hələ bir neçə gün bundan öncə Musk bildirmişdi ki, Starship-in ilk orbital uçuşunun uğurlu keçmə ehtimalı 50% təşkil edir. Qeyd etmək lazımdır ki, Starship sistemi 50 metrlik kosmik gəmidən və Super Heavy adlı 70 metrlik ağır raketdən ibarətdir. SpaceX gələcəkdə Starship-i Ay və Marsa insanlar ilə müxtəlif növ yüklərin daşınmasında istifadə etməyi planlaşdırır.