Bir neçə ay bundan öncə Apple şirkəti naqilsiz AirPods qulaqlıqlarının ikinci nəslini satışa çıxartmışdı. İkinci nəsil AirPods qulaqlıqlarının birinci nəsildən əsas fərqi onda idi ki, onlar naqilsiz şarj keysinə sahib idilər. İndi isə Counterpoint Research şirkəti bu ilin birinci rübü üzrə hesabatı təqdim edib. Həmin hesabata əsasən AirPods 2 qulaqlıqlarının nə dərəcədə uğurlu olduqlarını görmək olar. Bu barədə 9to5mac saytına istinadən Gagadget saytı xəbər verib.

    Beləliklə bu ilin birinci rüb nəticələrinə əsasən Apple şirkətinin naqilsiz qulaqlıqlar və aksessuarlar bazarındakı payı keçən ilin birinci rübündəki payı ilə eynidir. Burdan da belə nəticəyə gəlmək olar ki, AirPods 2 şirkətin ümumi satışlarına təsir etməyib. "Yeni modelin satışları bazarın qeyri-müəyyən reaksiyası səbəbilə əvvəlcədən gözlənildiyindən zəif olub" - deyə Counterpoint Research şirkətinin analitikləri bildiriblər.

    Bununla yanaşı müxtəlif endirim və aksiya kampaniyaları sayəsində birinci nəsil AirPods qulaqlıqları ikinci nəsildən daha yaxşı satılır. Çox güman ki, istifadəçilər yeni AirPods modellərində daha çox dəyişikliklər gözləyirdilər. Naqilsiz şarj keysindən əlavə olaraq AirPods 2 H1 adlı yeni çip ilə təchiz olunub, yeni Siri səsli əmrləri əldə edib.

    Bununla yanaşı telefon danışıqları zamanı AirPods 2-nin çalışma müddəti 2 saatdan 5 saata kimi yüksəlib. Qulaqlığın dizaynı da daxil olmaqla digər bütün özəlliklər baxımından o, birinci AirPods-dan heç fərqlənmir. Lakin satışlar üzrə tam yekun nəticələr daha sonra məlum olacaq. Belə ki, qulaqlıqlar birincü rübün sonunda satışa çıxmışdılar. Buna baxmayaraq Apple şirkəti 50%-dən çox pay sahibi göstəricisi ilə bu bazarın lideridir.