Kanadanın Affinity Credit Union adlı maliyyə assosiasiyası Apple şirkətinə qarşı antimonopoliya məhkəmə iddiası qaldırıb. Belə ki, Apple Pay sisteminin iPhone, iPad və Apple Watch modellərində yeganə ödəniş sistemi olması səbəbilə şirkət antimonopoliya qanunvericiliyinin pozulmasında günahlandırılır. Maliyyə assosiasiyasının fikrincə Apple məhsullarında yalnız Apple Pay sistemindən istifadə öz növbəsində rəqabət aparmağa çalışan digər ödəniş sistemlərinə zərər verir. iPhone və Apple şirkətinin digər mobil cihazlarının istifadəçiləri mağazalarda hər hansısa məhsulun alınması zamanı kontaktsız ödənişlər üçün Apple Pay-dən istifadə edirlər.

    Bununla belə PayPal və Square kimi digər ödəniş servisləri və bank tətbiqləri Apple cihazlarında alternativ ödəniş sistemi qismində istifadə edilə bilməzlər. Bu sahədə rəqabəti aradan qaldırmaqla Apple şirkəti kredit kart emitentlərindən (öz fəaliyyətinin maliyyələşdirilməsi və inkişafı üçün dəyərli kağızları dövriyyəyə buraxan təşkilat) komissiya əldə edir. Digər ödəniş servisləri isə bunu edə bilmirlər. Maliyyə assosiasiyasının fikrincə Apple şirkətinin bu cür praktikası antimonopoliya qanunvericiliyini pozur və şirkətə daha yüksək gəlirlərin əldə edilməsi imkanını verir. Qeyd etmək lazımdır ki, Apple banklardan kredit kartları üzrə əməliyyatlardan 0.15%, debet kartları üzrə əməliyyatlardan isə 0.05% komissiya əldə edir.

    Bununla belə Android üçün olan Samsung Pay və Google Pay kimi ödəniş sistemləri kredit kart emitentlərindən komissiya əldə etmirlər. Maliyyə assosiasiyası qeyd edib ki, 2019-cu ildə Apple şirkəti Apple Pay sisteminin əldə etdiyi komissiyalar hesabına 1 milyard dollar mənfəət qazanıb. Hesablamalara əsasən 2023-cü ilə kimi kredit kart emitentlərindən əldə edilən komissiyalar hesabına qazanılan gəlir 4 dəfə artacaq. Məhkəmə iddiasını qaldırmış tərəf əmindir ki, əgər Apple şirkəti digər təmsilçi tərəfindən ciddi rəqabət ilə qarşılaşsaydı, o bu cür böyük gəlirlər əldə edə bilməyəcəkdi. Apple şirkətinin təmsilçiləri isə bu məsələyə hələ heç bir fikir bildirməyiblər.