ABŞ Nümayəndələr Palatasının Xarici İşlər üzrə komitəsi TikTok-un ABŞ ərazisində bloklanmasına istiqamətlənmiş qanun layihəsinin gələn ay səsverməyə çıxarılmasını planlaşdırır. Sözügedən qanun layihəsi Ağ ev-ə siyasi üstünlüklər verəcək və o, həmin siyasi üstünlüklərdən istifadə edərək TikTok-u ABŞ-da qadağan edə bilər. “Bu tətbiqin Çin hökuməti üçün bizim telefonlarımıza giriş üsulu olması ilə bağlı narahatedici hallar var” - deyə komitənin rəhbəri Michael McCaul qeyd edib. Qeyd etmək lazımdır ki, TikTok-un ABŞ ərazisində bloklanmasına hələ ölkənin keçmiş prezidenti Donald Trump və onun administrasiyası nail olmağa çalışırdı.

    Lakin ABŞ-ın keçmiş prezidentinin qərarları ABŞ məhkəməsində ləğv edilmişdi. Joe Biden isə hakimiyyətə gələndən sonra onun administrasiyası bu məsələni ümumiyyətlə aradan qaldırdı. Yeniyetmələr arasında çox məşhur olan bir tətbiqi qanun səviyyəsində qadağan etmək heç də asan olmayacaq. Bu məsələdə Konqresin hər iki palatasında ciddi maneələr olacaq. TikTok-un ABŞ üzrə istifadəçi kütləsi 100 milyona bərabərdir. Son 3 il ərzində TikTok administrasiyası Vaşinqtona sübut etməyə çalışır ki, o, amerikalı istifadəçilərin konfidensial məlumatlarına sahib deyil və Pekin sosial şəbəkədəki kontentləri heç cür manipulyasiya edə bilməz.