Microsoft şirkəti süni zəka əsaslı alətləri öz məhsullarına inteqrasiya etməyə davam edir. Bu dəfə şirkət Bing axtarış sisteminin süni zəka əsaslı çat-botuna mətn formatında təsvirlər əsasında fotoların tərtib edilməsi funksiyasını əlavə edib. Bu funksiya OpenAI şirkətinin DALL-E adlı neyron şəbəkəsi əsasında çalışır. Qeyd etmək lazımdır ki, DALL-E məhz mətn formatında təsvirlər əsasında fotoların tərtib edilməsi üçün nəzərdə tutulmuş sistemdir. Bing Image Creator adlı yeni funksiya tədricən istifadəyə verilir və o, ilk mərhələdə hamı üçün aktiv deyil. Bundan əlavə olaraq Microsoft Bing Image Creator funksiyasını həmçinin özünün Edge brauzerinə də inteqrasiya edir.

    Brauzerin yan panelinə sözügedən funksiyadan istifadə etməyə imkan verəcək müvafiq düymə əlavə ediləcək. İstifadəçi həmin düyməyə klikləyəndən sonra tərtib edilməsini istədiyi fotonun təsvirini mətn formatında yazmalı olacaq. Neyron şəbəkəsi isə öz növbəsində daxil edilmiş mətn əsasında fotonu tərtib edəcək. İlkin mərhələdə Bing Image Creator funksiyası Bing çat-botunda yaradıcı ünsiyyət rejimində aktiv olacaq. Gələcəkdə isə bu funksiyanı çat-bot ilə istənilən ünsiyyət rejimində istifadə etmək mümkün olacaq. Qeyd etmək lazımdır ki, Bing axtarış sisteminin süni zəka əsaslı çat-botu 3 ünsiyyət rejimini dəstəkləyir. Yaradıcı, dəqiq və balanslaşdırılmış. Yaradıcı rejim çərçivəsində çat-bot daha ətraflı və orijinal cavabları, dəqiq rejimdə təyin edilmiş mövzu ətrafında dəqiq cavabları, balanslaşdırılmış rejimdə isə qeyd edilmiş ilk iki rejimin qarışığı tərzdə cavabları təqdim edir.